Spilavin á Hótel Hvolsvelli
Loksins er komin dagsetning á næstu Spilavin á Hótel Hvolsvelli, og verður hún helgina 23.-26. apríl 2026.
Spilavinin er spilaviðburður þar sem þátttakendur koma saman til að spila borðspil heila helgi (eða hluta úr henni). Þátttakendur eru hvattir til þess að koma með spil sem þeir vilja koma á borðið með sér en auk þess verður veglegt safn á staðnum sem hægt er að ganga í.
Við náðum frábærum samningum við hótelið í ár og nú getum við byrjað á fimmtudeginum, sem einmitt er frídagur! Sumardagurinn frysti! 10 herbergi eru laus á fimmtudagsnótt, fyrstir koma, frystir fá.
Fyrirkomulagið verður með svipuðu sniði og í ár. Hótelið mun bjóða upp á kvöldverðarhlaðborð bæði föstudags- og laugardagskvöld og léttan hádegismat (súpa og brauð) í hádeginu laugardaginn og sunnudaginn.
Hægt er að panta gistingu í eina nótt, tvær eða þrjár, eða bara koma og spila og keyra svo heim á kvöldin, hvað sem hentar ykkur. Hægt er að velja um annars vegar herbergi og fullt fæði og hins vegar aðeins herbergi.
Aðgangseyrir
Aðgangseyrir er 10.000kr, hvort sem gist er eður ei. Innifalið í aðgangseyrinum eru gosdrykkir, snakk og sælgæti yfir daginn. Ekki er leyfilegt að koma með áfengi í almenn rými en hótelið býður okkur 20% afslátt á barnum!
Skráning fer fram með því að fylla út formið https://bit.ly/spilavin2026
Þú greiðir fyrir miðana með því að leggja inn á 2200-15-035564, kennitala 050173-4379. Hafðu nafnið þitt í skýringu
Herbergi (pr. herbergi, pr. nótt, með morgunverði og sköttum)
Verðin í ár eru þau sömu og á síðustu Spilavin!
- Eins manns herbergi: 15.900kr
- Tveggja manna herbergi: 17.900kr
- Þriggja manna herbergi: 21.900kr
Gefinn er 10% afsláttur ef pantaðar eru tvær eða þrjár nætur!
Ath: Gisting er greidd á staðnum, við komu, beint til hótelsins
Gisting og fullt fæði (pr. einstakling, pr. nótt með sköttum)
- Ein nótt: 13.900kr
- Tvær nætur: 26.400kr
- Þrjár nætur (aukanótt á fimmtudegi): 35.400kr (fæði ekki innifalið á fimmudagskvöldinu eða í hádeginu á föstudag)
Aukagjald, 6.000kr á nótt leggst á ef óskað er eftir einstaklingsherbergi.
Innifalið er morgunmatur, léttur hádegisverður og kvöldverðarhlaðborð (sjá hér fyrir neðan).
Ath: Gisting og fæði er greidd á staðnum, við komu, beint til hótelsins.
Sérstakir gestir
Við erum á fullu að ganga frá samningum við gesti okkar fyrir Spilavin 2026 og munum segja frá þeim fljótlega.
Í fyrra vorum við með fimm frábæra gesti: Zee Garcia og Camillu Cleghorn frá The Dice Tower, Mark Dainty frá Not Bored Gaming, Dimitris Sikampenis frá Hegemonic Games og Vangelis Velles frá Game Maker í Grikklandi, sem færði okkur frábærar 3D prentaða minningagripi frá Spilavin 2025!
Gestirnir í ár verða sko engu síðri og við erum rosalega spennt að segja ykkur frá þeim. Og við lofum að þeir gestir verða líka með Topp 5 lista!
Morgunverðar- og hádegishlaðborð
Morgunverðarhlaðborð er innifalið í verði gistingar, hvort sem tekin er bara gisting eða fullt fæði.
Þau sem eru í fullu fæði hafa líka aðgang að léttu hádegisverðarhlaðborði þar sem boðið er uppá súpu, heimabakað brauð og samlokur. Ef óskað er eftir að kaupa aðgang að hádegishlaðborðinu er verðið 1.900kr.
Kvöldverðarhlaðborð
Í forrétt er súpa dagsins og heimabakað brauð
Í aðalrétt er hægt að velja um kjötbollur, kjúklingapottrétt, svínagúllas, kjúklingaleggi, karríkjúkling eða kjúklingabringu. Það er borið fram með kartöflum, hrísgrjónum og grænmeti eða pasta.
Í eftirrétt er hægt að velja um Crème Brûlée, karamellu Panna Cotta eða köku.
Valið er á milli forrétts og aðalrétts eða aðalrétts og eftirrétts. Verð fyrir kvöldverðarhlaðborð ef ekki er valið fullt fæði er 3.900kr.
Spilasafn
Þó svo að margir taki með sér eigin spil á hátíðina stærum við okkur af sístækkandi spilasafni sem við bjóðum upp á. Í ár ætlum við að taka með okkur 250 spil, í það minnsta! Eins og sjá má á myndinni hér til hliðar eru mörg spilanna í "Big box" útgáfum og oftar en ekki er búið að skipta út spilahlutunum fyrir fallegri hluti.
Og í mörgum tilfellum eru spilamottur í stað spilaborða í boði ;-)
Sölu- og skiptimarkaður
Í fyrra buðum við upp á sérstaka hillu, aðskilda frá spilasafninu, þar sem notuð spil voru til sölu. Og við ætlum að endurtaka það í ár. Þú kemur bara með spilið þitt, merkir það með verði og upplýsingum um hver þú ert (svo hægt sé að borga þér) og svo getur fólk skoðað úrvalið yfir hátíðina.
Við höfum gert þetta nokkuð óformlega síðustu ár og það hefur alltaf verið talsverð hreyfing á spilum.
Um hótelið
Hótel Hvolsvöllur er rótgróið fyrirtæki staðsett miðsvæðis í bænum Hvolsvelli í Rangárþingi Eystra. Hótelið var opnað árið 1984 og hefur síðan verið stækkað tvisvar, fyrst árið 1998 og árið 2007.
Með stækkun hótelsins árið 2007 bættust 26 herbergi við og í dag samanstendur hótelið af 66 herbergjum talsins. Þar af eru 22 þriggja manna, 32 tveggja manna og 8 eins manns herbergi. Það eru einnig 3 fjögurra manna fjölskylduherbergi, sem einnig virka sem superior herbergi.