Áramótaheit og vangaveltur

Árið var aðeins rólegra ár hvað varðar þyngd spila. Mesta spilun fékk My Shelfie: The Dice Game með 104 spilanir, svo Next Station: London með 45 spilanir, þá Qwixx með 22 spilanir. Fyrsta "spilara"-spilið kemur í raun ekki fyrr en í sjöunda, en það er Ticket to Ride með 7 spilanir og Sagrada Artisans með 6.

Af höfundum trjónir Alexander Pfister á toppnum, svo Stegmeier, Luciani, Uwe og Alan Moon. Það kemur svosem ekki á óvart, Great Western Trail í öllum útgáfum ratar ansi oft á borðið hjá okkur.

Besta nýja spilið (fyrir mér) sem ég spilaði? Góð spurning. Mjög góð spurning. Ég velti því ekkert brjálæðislega mikið fyrir mér en ...

1) World Order
2) Speakeasy
3) Galactic Cruise
4) Luthier
5) Civolution
6) Arcs
7) Vantage
8) Daitoshi
9) Ayar: Children of the Sun
10) Finspan

Ég ákvað í fyrra að prófa að bjóða erlendum gestum á hátíðina, svona til að krydda hana örlítið upp. Ég tók ákvörðunina auðvitað allof seint þá og hafði lítinn tíma til að fá gesti. Nokkrir bitu á öngulinn en ég missti þá þegar ég fór að draga þá að landi. Að lokum tókst mér þó að fá Luke Hector frá Broken Meeple til að koma.

Í ár náði ég nokkuð stærri fiskum. Zee Garcia og Camilla Cleghorn frá Dice Tower komu frá Bandaríkjunum, frá Englandi fékk ég góðan vin minn hann Mark Dainty og alla leið frá Grikklandi komu svo Dimitris Siakampenis og Vangelis Velles. Dimitris var með undir hendinni frumútgáfu af World Order og kenndi það amk. fimm sinnum á hátíðinni, auk þess sem hann kenndi líka "hitt spilið" frá Hegemonic Games, Hegemony.

Hátíðin náði nýjum hæðum í ár með 90 gestum og 45 herbergjum sem er 35% aukning frá árinu áður. Árið 2021 vorum við nú bara 20! Við buðum líka upp á þá nýung að hafa hádegis- og kvöldverðarhlaðborð sem vakti mikla lukku.

Eftir hátíðina buðum við gestum okkar í ferð um Suðurlandsundirlendið sem endaði svo í allsherjarveislu hjá Stefáni um kvöldið. Það er nokkuð ljóst að gestirnir fóru heim glaðir og ánægðir og töluðu fallega um hátíðina hvert sem þau fóru.

Stærsta breytingin í ár verður að ég hef ákveðið að stofna fyrirtæki í kringum hátíðina, enda betra að reka þetta sem alvöru fyrirtæki frekar en í rassvasanum hjá mér. Mér finnst það skemmtilega stórt skref, svoldið svona "fullorðins". Enda hátíðin orðin töluvert stærri en hún var upprunalega. Þá get ég líka réttilega látið hluta af aðgangseyrinum ganga upp í spilakaup, hillukaup og ýmislegt annað sem þarf við að reka svona hátíð.

Til dæmis keypti ég á Þorláksmessu tvö forláta pókerborð sem ég ætla að hafa á komandi Spilavin, til að auka aðeins á upplifunina. Þar munu m.a. erlendu gestirnir sitja og spila.

Já, erlendu gestirnir. Ég er enn að ganga frá síðustu hnútunum varðandi þá, en hvorki fleiri né færri en sex erlendir gestir verða í ár! Verða þau tilkynnt fljótlega í febrúar.

Fyrsta og önnur áskorunin eru svipaðar. Það að spila 26 spil frá árunum 2022-2025 og svo að spila 26 spil sem voru gefin út fyrir árið 2022. Ég á því miður allt of mörg spil óspiluð og ef ég set mér slíka áskorun vona ég að mér takist miklu betur að ná niður spilum af tækifærishillunni minni.

Þriðja áskorunin er svolítið metnaðarfyllri. Ég reyndi hana fyrst í fyrra (2024). Spila öll spilin á BGG Topp 100! Ég fékk hana Fríðu með mér í lið en það var ljóst mjög fljótlega að ég gat engan vegin haldið í við hana. Ég framlengdi áskorunina yfir árið í ár en nú þegar árið er liðið náði ég bara 55 spilum af 100 :-(  Það er ekki alveg sá árangur sem mig langaði í.

En mig langar að setja hana aftur. Byrja á byrjuninni. Og það ætla ég að gera. Frá 1. janúar til 31. desember ætla ég að spila öll spilin á BGG Topp 100 eins og hann stendur í dag, 31. desember 2025.

Og til að gera mér þetta aðeins auðveldara fyrir núna, þá langar mig að bjóða ykkur öllum að vera með! Ég er nýbyrjaður að nota borðspila-skipulags-appið Aftergame (aftergame.app) og er notandinn Drupalviking þar. Það er líka búið að búa til grúppu sem heitir Borðspil.is og ég hvet ykkur til að ganga í hana. Þar verða öll spilin og spilanirnar skráðar og verður hægt að skrá sig í spilin í gegnum appið. Er ég að vona að ég bæði kynnist fjölmörgum nýjum spilurum og fái líka að spila fjölbreyttari spil við alla vinina sem ég hef eignast í gegnum þetta frábæra áhugamál.

Ég mun líka blogga um allar spilanirnar, sem er eiginlega enn eitt áramótaheit hjá mér :-) Mig langar svo að búa til meira efni um borðspil á íslensku og eitt skrefið í því er að sjálfsögðu að hafa eitthvað til að skrifa um.

En hvaða reglur ætla ég að setja um listann? Því eins og þið mörg vitið, þá er topp 100 listinn á BGG pínulítið "beyglaður". Í fyrsta lagi eru nokkur spil á listanum tvítekin. Eiginlega alltof mörg :-(  Einnig eru á listanum nokkur Legacy spil sem ég er nú þegar búinn að spila, og flest þeirra oftar en einu sinni. Þannig að ég ætla því að spila BGG Topp 110ish listann árið 2026! Það er ekkert víst að þetta klikki!